БИШКЕК. Үгүт өнөктүгү ырасмий түрдө башталгандан бери Борбордук шайлоо комиссиясына Жогорку Кеңешке депутаттыкка талапкерлерден ар түрдүү мазмундагы элүүгө жакын арыз түштү. Түшкөн арыздар боюнча Борбордук шайлоо комиссиясы дароо чара көрүүдө. Бул тууралуу 7-февралда БШКнын үгүт кампаниясы учурунда мыйзам бузууларга көзөмөл жүргүзүү боюнча жумушчу топтун төрагасы Туйгунаалы Абдраимов билдирди. Шайлоо кодексине ылайык үгүт жараяны расмий түрдө 2-февралда башталды. Шайлоо алдындагы үгүт иштери добуш берүүгө 24 саат калганда токтотулат.
