БИШКЕК. Белгилүү коомдук ишмер Жумгалбек Аманбаевди акыркы сапарга узатуу иш чарасы 14-февралда Бишкектеги драма театрында өткөрүлдү. Тажияга мамлекеттик катчы Осмонакун Ибраимов баш болгон бийлик жана коомчулук өкүлдөрү катышышты. Анын сөөгү «Аларча» көрүстөнүнө коюлду. Жумгалбек Аманбаев Караколдогу үйүндө 11-февралда жүрөк оорусунан каза болду. №74 Жетиөгүз шайлоо округу боюнча Жогорку Кеңештин депутаттыгына талапкер болуп катталган Жумгалбек Аманбаев 1945-жылы төрөлгөн. Аманбаев 1991-жылы Кыргызстан коммунисттик партиясын жетектеп, андан кийин 1993-95-жылдары вице- премьер министр кызматын аркалап, ал эми акыркы жылдары «Буудай» мамлекеттик ишканасын жетектеп келген.