ТАЛАС. Бул тууралуу Талас облустук шайлоо комиссиясынын төрагасы Жантөш Жусупбеков 26-февраль күнү маалымдады. Анын айтымында, үч округ боюнча түзүлгөн 115 шайлоо участогунун бир жүз жетиси телефон байланышы менен камсыз. Калган сегиз участокко чөнтөк телефондору берилди. Бардык участокторго бюллетендер, бирден чоң, үчтөн көчмө урналар, баш бармакка белги коюучу суюктук жана жабдыктар жеткирилди. БШКнын жана шайлоо системалары боюнча эл аралык фонддун өкүлдөрү бардык участкалык комиссиялардын мүчөлөрүн 38 топко бириктирип, атайын окуулардан өткөрдү. Талас облусунда 113 миң 981 шайлоочу тизмеге киргизилген.
