БИШКЕК. № 33 Нарын шайлоо округунан талапкер Ишенбай Кадырбеков 13-мартта боло турган парламенттик шайлоонун экинчи айлампасына катыша албайт. БШК дүйшөмбүдөгү отурумунда Ишенбай Кадырбековдун округдук шайлоо комиссиясынын чечимин жокко чыгаруу тууралуу арызын карады. Округдук шайлоо комиссиясы саясий өнөктүк баштала электе үгүт жүргүздү деген арыздын негизинде Кадырбековду 5-мартта шайлоого катышуу укугунан ажыраткан. Оппозициячыл саясатчы Ишенбай Кадырбеков муну бийликтин арга таппаганда жасаган иши катары баалап, райондук сотко кайрыларын билдирди. Ал эми анын тарапкерлери Нарында эки күндөн бери нааразылык акциясын уюштуруп жатышат.
