А.Сегизбаевдин пикиринде, оппозиция президентти референдум өткөрүүгө түртүп жатат

БИШКЕК. “Оппозициячыл саясатчылар кырдаалды курчутуп, коомдо башаламандыкты пайда кылуу аракети менен президент Аскар Акаевди өз ыйгарым укуктарын тастыктоо максатында дагы бир ирет референдум өткөрүүгө түртүп жатышат”,-деп билдирди президенттин басма сөз катчысы Абдил Сегизбаев 11-мартта өткөргөн маалымат жыйынында. Анын айтымында, бүгүнкү кырдаал 2002-жылы Азимбек Бекназаров жана Исмаил Исаковдун демилгеси менен уюштурулган президентти кызматтан кетирүү талаптарын эске салат. “Оппозициянын андай аракетинен кийин 2003-жылы 2-февралында жалпы элдик референдум өткөрүлүп, президентти өлкө калкынын 79% колдогон”, - деп кошумчалады Абдил Сегизбаев.

Ал эми белгилүү саясатчы Азимбек Бекназаровдун пикиринде, Жалалабад облусунун Аксы районунун эли, бийлик элге каршы ок аткандыгына байланыштуу 2002-жылы президентти кызматтан кетирүү демилгесин көтөрүп чыккан:

- Мамлекеттик катчы Осмонакун Ибраимов башында туруп, президентти бийликте калтырууга элден кол топтоо аракети азыркы бийликтин мурдатан иштеп келаткан иши, - деди Азимбек Бекназаров.