БИШКЕК. Кызматтан четтетилген президент Аскар Акаев түшкөн учак Орусияга учуп баратып, багытын өзгөртүп Казакстандын Алмата шаарына жакын жерге конгон. Көп өтпөй анын үй-бүлөөсү дагы Ми-8 тик учагы менен Казакстанга жеткирилген. Мындай маалыматты ИТАР-ТАСС агенттиги таратты. Президенттин басма сөз кызматы Аскар Акаев жана анын үй бүлөсү учурда кайда экени тууралуу так маалымат жоктугун билдиришти. Ал эми мурдакы премьер-министр Николай Танаев 25-мартта эртең мененки саат 10 чамасында Орусиянын Кыргызстандагы элчилигинен чыгып келатып, “Азаттыктын” кабарчысынын суроолоруна жооп берүүдөн баш тартып, автоунаасына түшүп кетип калган.
