Бириккен Улуттар Уюму жана Африка Биримдиги тараткан маалыматка караганда, 7-апрелде Судандын Дарфур аймагында үч жүз элүүгө жакын аскер Хор Абече аттуу айылга келип, аны толугу менен талкалап-өрттөп кеткен, бузулбастан айылдык мечит менен мектеп кана калган. Буга чейин ал айыл козголоңчулардын колунда болчу. Бириккен Улуттардын айтымында, Суданга каршы эми чектөөлөр киргизилиши мүмкүн. Дарфурда 2003-жылдын февралынан бери уланып келаткан кагылышуулардан 180 миң адам курман болду жана эки миллионго жакын киши качкынга айланды.
