БИШКЕК. 14-апрелде Тышкы иштер министринин милдетин аткаруучу Роза Отунбаева Орусиянын, Беларустун жана Украинанын Кыргызстандагы элчиликтеринин жетекчилери жана улуттук-маданий борборлордун өкүлдөрү менен жолугушту. Жолугушуунун катышуучулары анда Бишкектеги учурдагы абалдан улам тынчсыздануларын билдиришти. Ал эми Роза Отунбаева өлкөдө бейпилдикти каалабаган адамдар тарабынан улуттар аралык араздашуулар менен башаламандыкты күчөтүү үчүн атайын айрым иштер жасалып жаткандыгын билдирип, мыйзамсыз иш-аракеттердин бардыгы токтотулаарына аларды ишендирди.
