БИШКЕК. Мамлекеттик Бажы инспекциясынын кызматкерлери кимиси өз милдетин абийирдүүлүк менен аткарса, мамлекет аны баалайт. Ал эми эскиче иштеп коррупциянын үлгүсүн колдонгондорго катуу чара көрүлөт. Бул тууралуу 16-апрелде вице-премьер-министр Данияр Үсөнов аталган инспекциянын кызматкерлери менен болгон жолугушууда билдирди. Ал бажы кызматындагы проблемаларды чечүү өкмөт тарабынан колго алынаарын, бажы төлөмдөрүнүн кирешесин үч эсеге жогорулатуу зарылдыгын белгиледи. Ошондой эле өлкөнүн түштүк аймагындагы бажы кызматынын иштерин жолго коюу максатында 18-апрелде Республикалык бажы кызматынын өкүлдөрү жөнөтүлөөрүн билдирди.
