БИШКЕК. «Республика» гезитинин башкы редактору Замира Сыдыкованын Кыргызстандын АКШдагы элчиси болуп дайындалышы күтүлүүдө. Бул тууралуу өлкөнүн Тышкы иштер министринин милдеттерин убактылуу аткаруучу Роза Отунбаева 16-апрелде «Азаттыктын» кабарчысына берген маегинде билдирди. Анын маалыматы боюнча 15-апрель күнү Жогорку Кеңештин Эл аралык байланыштар боюнча комитетинде АКШга элчи кылып дайындоого Замира Сыдыкованын талапкерлиги жактырылды. Роза Отунбаева белгилегендей, Замира Сыдыкова 92-жылы ачылган «Республика» гезити аркылуу Кыргызстанда демократиянын өнүгүшүнө чоң салымын кошту.
