Өзбекстанда 3-май күнү болгон элдик демонстрация милиция тарабынан күч менен таркатылганда бир нече адам жараат алганы кечээ күнү белгилүү болду. Митингчилер Ташкен шаарындагы АКШ элчилигинин алдында чогулган жана Өзбекстандагы адам укуктарынын бузулушу менен сөз эркиндигинин жоктугуна каршы нааразылык билдирген. Өлкөнүн Тышкы иштер министрлигинин айтымында болсо, эч ким сабалган эмес жана митингчилер жөн гана автобус менен элчиликтен башка жерге жеткирилип кое берилген. Элге каршы күч колдонулганы тууралуу кечээ күнү АКШ элчилиги өз тынчсыздануусун билдирди.
