БИШКЕК. Кыргызстандын президенттигине талапкер болуп жаткан атуулдардын медициналык текшерүүдөн өтүшү зарыл. Мындай билдирүүнү 10-майда Демократиялык коопсуздук боюнча коомдук кеңештин төрагасы, академик Мирсаид Миррахимов «Кабар» агенттигинде жасады. Анын баамында, айрым талапкерлердин психикалык жактан таза экендиги күмөн ойду жаратууда. Ушундан улам медициналык текшерүү жүргүзүү үчүн эл аралык эксперттерди чакырып, талапкерлерди текшерүүдөн өткөрсө болот. Академиктин айтымында, АКШнын президенттигине талапкерлер ден соолугунун, айрыкча, психикалык жактан дени соо экендигин аныктоо үчүн медициналык текшерүүдөн сөзсүз өтүшөт.
