БИШКЕК. Казак парламенти өлкөдөгү кыргызстандык эмгек мигранттарына байланыштуу эки тараптуу документтерди кыска мөөнөттө кароого көмөктөшөт. Бул тууралуу Казак парламентинин Сенатынын төрагасы Нуртай Абыкаев 3-июнда Кыргыз парламентинин төрагасы Өмүрбек Текебаев жана Кыргызстандын биринчи вице-премьер-министринин милдетин аткаруучу Феликс Кулов менен Алматыда болгон жолугушуусунда билдирди. Тараптар Кыргызстан менен Казакстандын ортосундагы паспорттук-визалык маселелерди, Казакстандагы кыргыз эмгек мигранттарынын абалына байланыштуу проблемаларды талкуулашты. Жолугушууда Кыргызстандагы азыркы коомдук-саясий кырдаал, өлкөдө күтүлүп жаткан Конституциялык реформа жөнүндө да сөз болду.
