БИШКЕК. Президенттик шайлоого байланыштуу учурда Кыргызстандын Тышкы иштер министрлиги , БШКнын кызматкерлери тарабынан Орусияда жана Казакстанда жашап, иштеп жүргөн атуулдардын тизмеси такталууда. Бүгүнкү күнгө карата Орусиядагы добуш берүүгө келе турган шайлоочулардын саны 17 миң, ал эми Казакстанда үч жарым миң адамга жетти. Добуш берүүгө чейин шайлоочулардын саны дагы көбөйүшү толук ыктымал. Бул тууралуу Тышкы иштер министрлигинин кызматкери Лидия Иманалиева билдирди. Анын айтымында, президенттик шайлоого чет өлкөлөрдө жүргөн атуулдардан баары болуп 21 миң шайлоочу добуш берүүгө катышат. Бул максатта учурда Орусиянын он бир шаарында он үч шайлоо участогу ал эми Казакстанда эки шайлоо участогу ачылды.
