БИШКЕК. Улуттук банктын төрагасы Улан Сарбанов Башкы прокуратура тарабынан үй камагына алынды. Бул тууралуу 2-сентябрда Баш прокурор Азимбек Бекназаров Жогорку Кеңеште билдирди. Улан Сарбановго 1999- жылы “экс-президентке мыйзамсыз 480 миң доллар берген жана кызматынан кыянаттык менен пайдаланган” деген айыптар тагылып, кылмыш иши козголду. Улуттук банктын төрагасы 2-сентябрда адвокатынын коштоосунда Башкы прокуратурага келип кеткен. Азимбек Бекназаров билдиргенге караганда, Аскар Акаевдин тушундагы чуулгандуу кылмыш иштер боюнча 6 иш сотко өттү. Мисалы, Рыспек Акматбаев учурда иши менен таанышып жатат, деди Баш прокурор. Ал эми “18 миллион долларды ыйгарып алган”, деп айыпталган Шалкар Жайсаңбаевдин иши эмки айда сотко өткөрүлөт.
