БИШКЕК. Ички иштер министрлигинин Бишкек шаардык ички иштер башкармалыгы тараткан маалыматка караганда, 17-ноябрда түн жарымына жакын Бишкек шаарындагы Ортосай базарына жакын жерде кесиби боюнча каскадер, 1953-жылы туулган Эсенбек Жээнчериев аттуу адам өлтүрүлүп, октон жарадар болгон эки адам ооруканага жаткырылды. Окуя болгон жерде Макаров пистолетинен атылган 17 октун гильзасы табылды. Бул окуяга байланыштуу Октябрь райондук прокуратурасы иш козгоду. Маалыматка караганда, кылмышты азия улутундагы эки адам жасагандыгы болжолдонууда.
