БИШКЕК. Мамлекеттик башкаруунун формасын аныктоо боюнча референдум өткөрүү сунушун Бишкекте 24-декабрда өткөн алтынчы элдик курултай кабыл алды. Ошондой эле 2006-жылы 24-мартта президент Курманбек Бакиев элдик революциянын бир жылдыгына карата эл алдында отчет берсин деген чечим кабыл алды. Курултайдын резолюциясында Аскар Акаев жана анын үй-бүлөсүнө, жакындарына тиешелүү мүлктөрдү сот чечими чыккыча сатууга тыюу салып, сот чечим чыгаргандан кийин аларды мамлекетке кайтаруу талабы жазылды. Алтынчы элдик курултай экс-президент Аскар Акаевди жана анын үй- бүлө мүчөлөрүн жоопко тартуу тууралуу да чечим кабыл алды.