Бишкек. 31-январда Мамлекеттик кыргыз телерадиокампаниясынын радио жамаатынын өкүлдөрү Жогорку Кеңештин алдына нааразылык акцияга чыгышат. Бул тууралуу 30-январда радионун кызматкерлери «Азаттыкка» билдиришти. Кыргызстан журналисстер профсоюзунан маалымдашкандай, радионун жамаатынын бир бөлүгүнүн талабы – президенттин жардыгы менен жаңыдан КТРдин башкы директорунун радио боюнча орун басарлыгына дайындалган Байма Сутенованын ордуна кайрадан Жылдыз Муслимованы дайындоо. Ал эми жамааттын бир бөлүгү болсо, Байма Сутенова менен иштөөнү каалайт.
