АКШнын мамкатчысы Кондолиза Райс Орусияда демократия түптөлүшүнө күмөнсүнүп жатканын билдирди. Ал америкалык CBS телеканалынын “Эл жүзү” деген программада сүйлөгөн сөзүндө: “Орусияда демократиялык баалуулуктардан артка чегинүү аракеттери болуп жатканына Кошмо Штаттары тынчсызданып жатат”, - деди. Буга мисал катарында Райс Орусияда өкмөттүк эмес уюмдардын ишине айрым чектөөлөр коюлуп жатканын жана Кремль көгүлтүр газды Украинага каршы курал катарында пайдаланып жатканын айтты.