БИШКЕК. Таластагы «Жерүй» алтын ишканасынын 200 чакты жумушчусу аталган ишкананын курулушун улантуу талабы менен бүгүн өкмөт үйүнүн алдына пикетке чыгышты. Жерүй алтынын иштетмекчи болгон «Талас Голд Майнинг» компаниясына кыргыз өкмөтү тыюу салганына байланыштуу өткөн айда курулуш иштери токтогон. Нааразы тарап менен «Кыргызалтын» акционердик коомунун жетекчиси Алмаз Жакыпов жолугушуп, бул маселе боюнча атайын комиссия түзүлгөнүн билдирди. Пикетчилер болсо комиссиянын жыйынтыгын укмайын тарашпай турганын, нааразылык чарасын эртең да улантышаарын айтышууда.
