Линктер

ЧУКУЛ КАБАР!
21-Январь, 2022 жума, Бишкек убактысы 20:15

ИНТЕРНЕТТЕ АЛГАЧКЫ КЫРГЫЗ МУЗЫКАЛЫК РАДИОСУ ИШТЕЙ БАШТАДЫ


Жаныл Жусубжан, Прага Сиз дүйнөнүн кайсы чөлкөмүндө жүрбөңүз, мындан ары азыр биз угуп жаткан Жеңижоктун арманынан же башка кыргыздын кылым карыткан ыр-күүлөрүнөн эч кем болбойсуз. Бул үчүн аудио касеталарды магнотофонуңуз менен кошо көтөрүп жүрүүнүн кереги болбойт, Лондондобу, Гонконгдобу, же Аляскада болобу, интернет бар жерде компютерге кирип, www.kyrgyzradio.com дегенди тересиз да, кыргыз күүлөрүн, кыргыз эстрадасын, куудулдарды, манас айтыштарын моокум кана уга бересиз. Кыргыз элинин тарыхында Интернеттеги алгачкы музыкалык радиону Түркиядан туруп, Мирлан Мамышев ачты. Жакында ал мекенине баратканда биздин суроолорубузга жооп берген эле, анда ошол ат жалындагы маекке кулак салыңыз. Түркияда компютердик програмист болуп иштеген Мирлан алгач Кыргызстанга сапарынын максатына токтолду.

МИРЛАН МАМЫШЕВ: Жакында чет өлкөдө окуп жаткан өзгөндүк жаштар айылдык жаштар үчүн компютердик билим берүү программасын баштаганы жатабыз. Ошолорду көрүп, анан чет өлкөдө иштеген, окуган башка балдар менен сүйлөшүп, ошол программаны ишке ашырсак деген оюм бар.

ЖАҢЫЛ ЖУСУБЖАН: Түркияда силер кыргыз радиосун иштетип жаткан экенсиңер, кайсы максатты көздөдүңөр?

МИРЛАН МАМЫШЕВ: Кыргыз радиосунун ачылганынын себеби азыр кыргызча ырлар, манас, мыскыл жана тамаша интернет аркылуу берилбейт. Азыр Америкада, Орусияда, Кореяда көп кыргыздар иштеп жүрүшөт, биз аларга кыргызча ырларды угузуп туралы дедик.

ЖАҢЫЛ ЖУСУБЖАН: Угуп жатышабы?

МИРЛАН МАМЫШЕВ: Азырынча угуп жатышат. АКШда, айрыкча Орусиядан көп, Кореядан, Пакситандан кирген угуучуларыбыз бар. Азырынча музыка берип жатабыз. Жакшы кабарларды, жарыштарды уюштуралы деген максатыбыз бар. Биз канчалык кыргызча ырларды көп уксак, өзүбүзгө болгон ишеним ошончолуп артат. Өзүбүздүн ырчыларыбызды чыгарып, кыргыз рэп жана башка музыкага мүмкүнчүлүк берсек, биздин музыка да өнүгөт. Башкы максаттарыбыздын бири ошол.

ЖАҢЫЛ ЖУСУБЖАН: Ошентип, жаңы жылда жаңы технологиянын аркасы менен Мирлан Мамышев деген жигит тээ алыскы Истамбулдан кыргыз маданиятына ушинтип бараандуу салым кошууда. Анын эмгегин алыста жүргөн улутташтарыбыз айрыкча баалары айтпаса да түшүнүктүү. Интернеттеги тунгуч кыргыз музыка радиосунун дарегин дагы эскерте кетсем - www.kyrgyzradio.com. Бул радио күндө 18 саат ободо болот.
XS
SM
MD
LG