БИШКЕК. «Эркиндик» партиясынын башчысы Топчубек Тургуналиев мурдагы президент Аскар Акаев бийликте турган учурда негизсиз саясий куугунтукка алган деп Бишкектин Биринчи май райондук сотуна доо арыз менен кайрылды жана бул үчүн экс-президенттен 100 миллион сом өндүрүп берүүнү сурады. Мындан сырткары 1999-2000-жылдары Аскар Акаевге кол салууга даярданышкан деген айып менен камалган Топчубек Тургуналиев баштаган алты киши жалган жалаа менен камакка алганы үчүн ошол учурда улуттук коопсуздук кызматында, сот жана прокуратура органдарында иштеген айрым адамдарды сот жообуна тартуу өтүнүчү менен башкы прокуратурага кайрылышты.
