Украинанын борбору Киев шаарында бүгүн кечинде Чернобыль алааматында курман болгондорду эскерүү жыйыны болот. Мындан 20 жыл мурда, 1986-жылдын 26-апрелинде Чернобылдагы атом станциясынын бир реактору жарылып, абага радиоактивдүү заттар эбегейсиз өлчөмдө чыгып кеткен. Анын зыяны Украина, Беларус жана Орусияда беш миллионго жакын адамга тийди. Бириккен Улуттардын эсеби боюнча, радиациянын түз кесепетинен бардыгы болуп тогуз миңге жакын адам өлөт, "Гринпис" уюмунун айтымында болсо, өлгөндөрдүн саны 100 миңге жетиши мүмкүн.
