Бириккен улуттар уюмунун баш-катчысы Кофи Аннан бүгүн Жакынкы Чыгышка сапарын улантып, Сауд Арапстанга барат. Жекшембиде ал Ирандан Катарга келди. Тегеранда болсо ирандык президент Махмуд Ахмединежад менен өткөн сүйлөшүүлөр ийгилик алып келген жок. Аннан Ирандын президентин уран байытуудан баш тарттырууга аракет кылган болчу. Махмуд Ахмединежад анын өлкөсү өзүнүн өзөктүк программасы боюнча сүйлөшүүлөргө даяр экенин билдирген, бирок уран байытуу ишин сүйлөшүүлөр толук бүткөнгө чейин токтотпой турганын дагы бир ирет кайталады.
