Депутат Өмүрбек Текебаев Конституциянын жаңы редакциясынын кабыл алынышына нааразылык иретинде добуш берүүгө катышпасын билдирди. Ал ошондой эле талкуу учурунда долбоорду өзгөртүүгө мүмкүн эместигин белгиледи. Эртең мененки талкууда айтылган бир катар депутаттардын сунуштары бир сааттык танапис учурунда долбоорго киргизилген. Аларды төрага Марат Султанов окуп берди. Депутат Акматбек Келдибеков 8-ноябрда Конституция кабыл алынаарда да долбоор бир нече жолу өзгөртүлгөнүн эске салды.
