Багдадда бүгүн АКШ, Иран, Сирия жана ондогон башка мамлекеттердин жана регионалдык уюмдардын өкүлдөрү Ирактагы коопсуздук маселелерин талкуулап жатышат. Шаардын жашыл тилкесинде өтүп жаткан жыйын негизинен Ирактагы зомбулукка чекит коюуу аракеттерине Тегеран менен Дамаскты тартууну көздөйт. Жыйынды Ирактын Тышкы иштер министри Хашияр Зебари расмий ачты. Бул конференция жогорку деңгээлдеги жолугушууларга карай алгачкы кадам болуп калмакчы деди министр.
