Апрель айынан тартып дин кызматкерлери аттестациядан өтүшөт. Сынактан жыгылгандар молдолук кыла алышпайт. Бул туурасында Кыргызстан мусулмандарынын муфтийи Муратаалы ажы Жуманов Ош облусунун райондоруна жасаган сапарында жарыя кылды. Анын айтымында, дал ушундай иргөө аркылуу чала сабат, эл арасында кадыры төмөн, диний экстремисттер менен күрөшүүгө жарамсыз имам, молдолордон арылууга аракет болмокчу. Жергиликтүү адистер муфтияттын мындай кадамын кезектеги популизм катары баалап, мурда да ушундай аракет болуп, бирок, тармак коррупциялашып кеткендиктен, саамалык ара жолдо калгандыгын айтышууда. (АТо)
