Рим папасы Бенедикт XVI 1930-жылдары Украинада ачарчылыктан көз жумгандарга дуба кылды. Жекшембиде Рим-католик чиркөөсүнүн башчысы “адамдардын өмүрү жана эркиндиги эч кандай идеологиянын курмандыгы болбошу керек” деп билдирди. 22-ноябрда Украинада миллиондогон кишилердин өмүрүн алып кеткен ачарчылыктын 75 жылдыгына арналган иш-чаралар өттү. Аза күтүү жөрөлгөсүнө Орусиянын бийлик өкүлдөрү катышкан жок. Кремл расмий Киевдин 30-жылдары болгон окуяны Украин элине каршы геноцид деп талкуулоосуна макул эмес.
