АКШнын жаңы шайланган президенти Барак Обама өлкөнүн бюджетиндеги керексиз чыгымдар кыскартыла турганын жарыялады. Маалымат жыйынында сүйлөгөн Обама бюджет реформасы – тыкыр зарылдык деп билдирди. Ак үйдүн административдик бюджет кеңсесинин башчысы болуп Питер Орсаг дайындалды. Аталган кеңсе казынанын акчасын федералдык мекемелер кандай жумшап жатканын көзөмөлдөйт. Орсаг Билл Клинтондун тушунда президенттин экономикалык кеңешчиси болгон, азыр конгресстин бюджет башкармалыгын жетектейт.
