Шиврай Патил кеминде 174 кишинин өмүрү кыйылган бул окуялар үчүн өзүнө "моралдык жоопкерчиликти" алып жаткандыгын билдирди. Ички иштер министрлигин жетектөөгө буга чейин каржы министринин кызматында турган Паланияппан Чидамбарам дайындалды. Соңку маалыматтар боюнча, кол салуудан 174 киши каза таап, 200дөн ашуун адам жаракат алды. Өлгөндөрдүн басымдуу бөлүгү индиялыктар, жыйырмадайы чет элдиктер.
Автоматтар жана гранаттар менен куралданган согушкерлер Индиянын каржы жана ишкер борбору катары эсептелген Мумбай шаарына шаршемби күнү кол салышкан эле.
