Украина менен Орусиянын газ компаниялары Москвада он жылга эсептелген келишимге кол коюшкандан кийин Батыш Европага Украина аркылуу орусиялык газ келе баштады. Бул тууралуу Болгария, Босния, Венгрия, Словакия жана Чехиянын мунай компаниялары маалымдашты. Хорватия, Румыния жана Сербияга орусиялык газ жакын арада келери кабарланды. Орусия менен Украина ортосундагы газ чатагынан улам январдын башынан бери Европанын бир катар өлкөлөрү көгүлтүр отунсуз калган.
