Кеңешмеде баяндалгандай, облуста былтыр 27 миллиард сомдон ашык айыл чарба, өнөр-жай өнүмдөрү чыгарылган. Электр кубаты 24 пайызга кем өндүрүлгөн. Макмал алтын комбинаты алтын чыгарууну 189 килограммга азайткан. 21 миң гектар аянт иштетилбей калган. Сузак, Таш-Булак, Барпы айыл өкмөттөрү мамлекеттин үлүшүндөгү жерлерди кызмат абалы үчүн пайдаланышкан. Чет өлкөлүк кредиттер менен казыналык каражаттарды кайтаруу начар бойдон калууда. Жалал-Абат шаары жапон грантын, Аксы районундагы эки айыл өкмөтү өкмөттүк аманат акчаны төлөөдө бир сом да кайтарбаган. Экономикалык кризистин айынан өзбекстандык ишкана “Нур” акционердик коому менен келишим түзбөгөндүктөн быйыл Жалал-Абаттагы бул ишкана 60 миллион сомдук өнүмдү алалбай калуусу күтүлүүдө деп баяндалды бүгүнкү кеңешмеде. (YA)