Пакистанда оппозиция тарапкерлери бийликке каршы жалпы улуттук нааразылык чараларын баштап, 16-мартта Исламабадда чечүүчү митингин өткөрүүнү пландашууда. Маалыматтарга караганда, оппозициядагы жүздөгөн активисттерди жана алардын адвокаттарын бийлик кармап кетти. Синдх жана Пенжаб аймактарында нааразылык жыйын өттү. Оппозиция бийликтен Жогорку Соттун мурдагы төрагасы Ифтикар Чаудрини ордуна коюу убадасын аткарууну жана оппозициячыл саясатчы, мурдагы өкмөт башчы Наваз Шарифти шайлоодон четтеткен чечимди жок кылууну талап кылууда. Чаудри мурдагы президент Первез Мушарраф тарабынан 2007-жылы кызматтан алынган болчу.
