25-мартта Жогорку Сот Жогорку Кеңештин төрагасынын орун басары Кубанычбек Исабековдун арызын карады. Исабеков арызында “Кумтөр голд компанини” жер салыгы үчүн 94 миллион 170 миң сом төлөөгө милдеттендирүүнү өтүнгөн. Сотто Кумтөр кенинин өкүлү Валентин Чернышев ишти кароону кийинки мөөнөткө жылдырууну, анткени учурда өкмөт менен “Кумтөр голд компанинин” ортосунда сүйлөшүүлөр жүрүп, жаңы келишимге жетишүү алдында турганын, ошону менен көп маселелер чечилерин билдирген. Натыйжада сот ишти кароону 16-апрелге которуп койду. Кубанычбек Исабеков соттун мындай чечимине канааттанбаганын билдирди. Бул тууралуу парламенттин маалымат кызматынан кабарлашты.(AiT)
