Ирактын түштүгүндөгү Басрада жайгашкан британ аскерий базасы эми АКШ күчтөрүнүн көзөмөлүнө өтүүдө. Өткөн жылы Ирак бийликтери менен түзүлгөн келишим боюнча ушул жылдын июль айына чейин Британиянын 4 миң 100 аскери өлкөдөн толук чыгарылышы керек. 2003-жылдын март айында АКШ аскерлери Иракка кирген кезде Британия анын негизги өнөктөшү болгон эле. Анда Иракка 46 миң чамалуу чет элдик жоокерлер киргизилип, алардын жүз сексени согуштук иш-чаралар учурунда набыт болгон.
