Дүйнөлүк автомобил өнөр жайындагы эңгезер компаниялардын бири General Motors дүйшөмбү күнү кредиторлордун дооматынан коргоону сурап, сотко кайрылды. Муну менен ишкана өзүнүн банкрот болгонун жарыялады. General Motors өзүн банкрот кылып жарыялаган соң президент Барак Обама атайын билдирүү жасап, “эгер бардык иш планга ылайык жүрсө, компания кайра тикеленип, кирешелүү ишканага айланат” деп билдирди. Администрациянын планы боюнча жаңы General Motors компаниясындагы жарнактардын 60 проценти өкмөткө өтөт, өз кезегинде компанияга мамлекеттик колдоо катары казынадан 30 миллиард доллар каражат бөлүнөт.
