Бул тууралуу августтун аягында британ армиясынын башчысы болот деп күтүлүп жаткан генерал Дэвид Ричардс билдирди. Анын айтымында, Британия Ооганстандын өнүгүшүндө мындан ары да активдүү роль ойной берет. “Ооганстандын өзүнүн коопсуздук күчтөрү жагдайды толук көзөмөлдөй ала турган деңгээлге жеткенге чейин ал жактан НАТОнун күчтөрү да кетпейт” деди ал. Ооганстанда 9 миңдей британ аскери бар. Британия 2001-жылы коалициялык күчтөргө кошулгандан бери Ооганстанда 195 аскерин жоготту.
