Өткөн жылы августта Манас аба майданынын жанында кырсыкка учураган “Боинг -737” учагынан аман калган Ирандын жараны Маланий Мустафа Реза “Итек-Эйр” авиа компаниясын сотко берди. Ал аталган компаниядан 1 млн. долларга чукул моралдык жана материалдык чыгымын төлөп берүүсүн талап кылууда. Анын айтымында, учак менен учуп баратканда анын жанында 850 миң АКШ доллары болгон. “Итек-Эйр” компаниясына таандык “Боинг -737” учагы 2008-жылы 24-августта Жаңы-Жер айылынын аймагында кулап түшүп, күйүп кеткен. Андагы 65 жүргүнчү каза болуп, 25 адам жана экипаждын 6 мүчөсү аман калышкан. Бул боюнча учактын учкучтары Юрий Гончаров менен Тимофей Водолагинге айып тагылууда. (AJ)