Гондурастын убактылуу жетекчилиги кулатылган президент менен иштешүүдөн баш тартты. АКШнын арачылыгы менен жетишилген келишим боюнча, июль айындагы төңкөрүштө бийликтен четтетилген Мануэл Зелая Гондурастын учурдагы мамлекет башчысы Роберто Мичелетти менен кечээ кечке чейин «биримдик жана элдешүү» өкмөтүн түзүшү керек эле. Бирок Мичелетти бүгүн биримдик өкмөтүн Зелаясыз түзөөрүн жарыялады. Конгресстин биринчи өзүн бийликке кайра алып келишин талап кылган Зелая министрликке талапкерлерди көрсөтүүдөн баш тарткан эле.
