Бул тууралуу акция өткөрүүчүлөрдүн бири “Азаттыкка” билдирди. Анын айтымында, мурдагы коргоо министри Исмаил Исаковдун таламын талашкан жердештери бийликтен генералга куугунтуктоону токтотууну, аны сотто актоону талап кылышат. Буга чейин 17-декабрда алар Гүлчөдө нааразылык акциясын өткөрүп, ушундай талаптарды койгон. Эгерде бул талаптар аткарылбаса, алайлыктар жер-жерлерде жөө жүрүш, митинг, ачкачылык уюштурарын билдиришкен. Алардын мындай талабын райондун акими Алмазбек Осмонов мыйзамсыз жорук катары сыпаттаган. (AJ)
