Жекшембиде өтө турган президенттик шайлоонун экинчи айлампасында бул мыйзам добуштарды бурмалоого алып келет деген эскертүүө карабастан, Виктор Ющенко өзгөртүүлөрдү мыйзам күчүнө киргизген жардыкка кол койду. Оппозициянын талапкери Виктор Янукович менен ат салыша турган өкмөт башчысы Юлия Тимошенко бул өзгөртүүлөрдү Януковичтин «Региондор партиясы» шайлоону бурмалаганга пайдаланат деп ырастап, Ющенкону аларды четке кагууга чакырган эле. Тимошенко «Янукович шайлоону бурмалоого аракеттенсе, Кызгылтым төңкөрүшүндөй, элди көчөгө алып чыгам» деп эскертти.
