Сүйлөшүү Вашингтондо бүгүн башталууда. Пакистандык делегацияны өлкөнүн тышкы иштер министри Шах Мехмуд Куреши жана армия башчысы генерал Ашфак Каяни баштап барды. Америкалык тараптан Мамлекеттик катчы Хиллари Клинтон жана башка өкүлдөр катышат. АКШ буга чейин Пакистандын ядролук технологияны башка өлкөлөргө жиберип жаткандыгын сынга алган эле. Пакистан АКШ менен Индияныкына окшош келишим түзүүгө үмүттөнүүдө. Сүйлөшүүдө коопсуздук кызматташтыгы, анын ичинде Пакистандын ооган чек арасындагы исламчыл согушкерлер менен күрөшүндө учкучсуз учкан согуштук учак маселеси көтөрүшү күтүлүүдө.
