Көз карандысыз журналисттерди коргоо боюнча дүйнөлүк комитет Кыргызстандагы сөз эркиндигинин артка чегингенине кабатырланып президент Курманбек Бакиевге расмий кат жиберди. Анда ыңкылаптын беш жылдыгы белгиленип жаткан учурда өлкөдө эркин басма сөзгө, көз карандысыз маалымат каражаттарына кысым, журналисттерге кол салуу күчөгөнү айыпталган. Расмий бийликке карата сын-пикирлер чагылдырылган “Азаттык” үналгысын уктуруунун бир топ аймактарда чектелиши, Интернет сайттардын ачылбай жатышы, гезиттердин жабылышы буга мисал катары белгиленген. Президенттин катчылыгы азырынча бул тууралуу комментарий бере элек. (EBM)
