Кагылышуу Грузиянын ички иштер министрлиги алдында полиция күнүнө арнап өткөрүлгөн парад учурунда болду. Анти-өкмөттүк ураандарды чакырган бир нече жүз демонстрант полицияны таш бараңга алганда, аларды полиция желим таяктар менен уруп таркатты.
Оппозиция лидери, мурдакы премьер-министр Зураб Ногаидели Ройтерс агенттигине демонстранттардын талабын мындай түшүндүрдү:
-Биз адамдарды мыйзамсыз камакка алууга жана абакка салууга каршы күрөшүү үчүн чогулганбыз. Акыркы саясый туткун эркиндикке чыкканча күрөштү токтотпойбуз.
Оппозиция лидерлеринин кабарлашынча, тополоңдо үч киши жараат алган.
Грузияда 30-майда жергиликтүү бийликтерге шайлоо өтөт. Бул 2008-жылкы Россия менен болгон согуштан берки биринчи шайлоо. Согуштан бери президент Михаил Саакашвилинин эл ичиндеги популярдуулугу бир кыйла төмөндөп кеткен. Оппозиция Саакашвилини "урушта жеңилди" деп күнөөлөп келет.
