Өзбекстан расмий катталган бардык кыргызстандык качкындарды акыркы үч күндө ата журтуна кайтарганын “Фергана.ру” агенттиги 26-июнда кабарлады. Маалыматка караганда, өлкөдө кеселдер менен жарадарлар гана калтырылган. Анжиян облусундагы Кожо-Абад районундагы консерва заводундагы качкындар лагериндеги 3,5 миңдей адам автобуска мажбурлап салынганын оштук Барно деген аял “Азаттыктын” өзбек кызматына 26-июнда телефон менен билдирип: “Мажбур кылышты. Эч ким калбайт, Ошто тынчтык орногон дешти. Биз акыркы автобуска чыктык. Эч ким калбады. Лагерь жабылды,"- деп айтты.
