Секулярист Ияд Аллави Сириянын борборундагы мейманканалардын биринде шийиттердин радикал имамы Муктада ас-Садр менен жолугуп, сүйлөшүүлөрдү өткөрдү. Адегенде ирактык келишкис эки саясатчыны Сириянын президенти Башар ал-Асад өз-өзүнчө кабыл алды. Тараптар кандай чечимге келишкени белгисиз. Бирок Аллави ырастагандай, ас-Садр азыркы премьер-министр Нури ал-Маликиге караганда кыйла мунасакөйлүгүн көрсөттү. Аллави жетектеген сүннүлөрдүн саясий блогу парламенттик шайлоодо көпчүлүк мандат алган, бирок өкмөт куроо үчүн башка фракциялардын колдоосу керек.
