АКШ жана Индонезия терроризмге жана климаттын өзгөрүүсүнө каршы күрөштөгү, соодадагы кызматташууну жакшырталы деп макулдашты. Келишим тууралуу АКШ президенти Барак Обама жана Индонезия президенти Сусило Бамбанг Юдхойоно шейшемби күнү Жакартада жар салышты. Бул жөнүндө Барак Обама: "Эки арадагы соода, анын ичинде америкалык товарларды Индонезияга экспорттоо ылдам өсүүдө. Себеби Индонезия дүйнөдө тез өсүп бараткан базарлардын бири. Менин демилгем боюнча, биз АКШнын экспортун эки эсеге көбөйтмөк болуудабыз. Президент Юдхойоно экөөбүз сооданы жана инвестицияны дагы жандандырууга шарт түзүүнүн жолдорун талкууладык",-деп билдирди.
