Европадагы коопсуздук жана кызматташтык уюмунун жогорку деңгээлдеги мындай жыйыны биринчи ирет экс-совет республикасында өтүп жатат. Саммитке уюмга кирген өлкөлөрдүн мамлекет жана өкмөт башчылары, Улуттар Уюмунун баш катчысы катышууда. Акыркы он бир жылдан бери уюмдун лидерлери мындай жыйынга чогула элек болчу. Саммитте Ооганстандагы кырдаал, Кыргызстанга эл аралык жардам көрсөтүү, Карабах проблемасын жөнгө салуу жана башка маселелер талкууланууда.
