Америкалык дипломаттардын жашыруун каттарынын аталган интернет баракча шардана кылган кезектеги бөлүгү “Нью-Йорк Таймс” гезитинде жарыяланды. Андагы маалыматка караганда, Googleга жасалган хаккердик чабуул Кытай компартиясынын саясий бюросунун мүчөсүнүн көрсөтмөсү менен ишке ашырылган. Быйыл жыл башында Кытай менен Googleдун ортосунда кытайлык адам укугун коргоочулардын электрондук даректерин алуу үчүн хаккердик чабуул жасалып жатканына байланыштуу чатак чыгып, натыйжада компания Кытайдагы ишин кыска убакытка токтоткон. Иш Google өз операцияларына айрым бир өзгөртүүлөрдү киргизгенден кийин кайра жанданды.
