Нурсултан Назарбаев жогорку мамлекеттик кызматта дагы сегиз жыл калышын колдогондордун кол тамгасын чогултуп жаткан топтун ырастоосунда, Казакстанда бул демилгени «шайлоочулардын жарымы» колдойт. Астанадагы пресс-конференцияда демилге тобунун жетекчиси, академик Эрлан Сыдыков азырга чейин беш миллион шайлоочунун колу топтолгонун билдирди. Сунушталган референдумда казак президентинин келерки жылы бүтүп жаткан кызмат мөөнөтүн 2020-жылга чейин узартуу каралган. Демилгелүү топтун дагы бир өкүлү, парламенттин мүчөсү Анатолий Башмаков маселе бүрсүгүнү парламенттин бирдиктүү жыйынында карала тургандыгын кошумчалады.
